गेल्या काही दिवसांपासून राज्यातील चर्चेचा केंद्रबिंदू ठरत असलेल्या मनोज जरांगे यांनी मराठा आरक्षणाच्या मागणीसाठी सुरु केलेले उपोषण अद्याप मागे घेतलेले नाही. आज त्यांच्या उपोषणाचा १५ वा दिवस आहे. राज्य सरकारने आश्वासनांची खैरात आणि अनेकदा विनंती करुनही मनोज जरांगे यांचा उपोषण सुरु ठेवण्याचा निर्धार तसूभरही ढळला नव्हता. मात्र, मंगळवारी अंतरवाली सराटी येथे संभाजी भिडे हे जरांगे यांच्या भेटीला आले तेव्हा उपोषणस्थळाचा नूरच पालटला. संभाजी भिडे याठिकाणी आले तेव्हा याठिकाणी अर्जुन खोतकर, संदीपान भुमरे हे दोन्ही नेते मनोज जरांगे यांच्याशी चर्चा करत होते. मराठा आरक्षणासंदर्भात झालेल्या सर्वपक्षीय बैठकीत झालेल्या ठरावांची माहिती त्यांनी जरांगे-पाटील यांना दिली. सरकारच्यावतीने अर्जुन खोतकर हे गेल्या काही दिवसांपासून जरांगे-पाटील यांची समजूत काढण्याचा प्रयत्न करत आहेत. कालच्या बैठकीत झालेल्या ठरावांबद्दल खोतकर हे आज प्रसारमाध्यमांना माहिती देत होते. नेमक्या त्याचवेळी व्यासपीठावर संभाजी भिडे यांची एन्ट्री झाली. त्यानंतर संभाजी भिडे यांनी अचानकपणे सर्व सूत्रे स्वत:च्या हाती घेत मनोज जरांगे यांच्याशी संवाद साधायला सुरुवात केली. त्यामुळे अर्जुन खोतकर आणि संदीपान भुमरे यांच्याकडे बाजूला बसून राहण्याशिवाय पर्याय उरला नाही.
No comments:
Post a Comment