एकाच घरात आढळले सात मृतदेह

 रांची (झारखंड) 

दिल्लीतील एकाच कुटुंबातील अकरा जणांच्या आत्महत्येच्या प्रकरणातील गूढ अद्याप उकलले नसतानाच, रांची शहरात आर्थिक अडचणीत असलेल्या एका कुटुंबातील सात जणांचे मृतदेह ते भाड्याने राहत असलेल्या घरात सोमवारी आढळल्याने खळबळ उडाली. 

मृतांमध्ये साठीतील एक जोडपे, त्यांचे दोन मुलगे, एक सून आणि दोन अल्पवयीन नातवंडांचा समावेश आहे. दोन भावांनी कुटुंबातील इतर सदस्यांची हत्या करून नंतर आत्महत्या केल्याचे प्रथामिक तपासात दिसते, असे पोलिस महानिरीक्षक ए. व्ही. होमकर यांनी सांगितले. सचिदानंद झा (६५), त्यांची पत्नी गायत्रीदेवी (६०), मुलगे दीपक (४०) आणि रुपेश (३०), सून सोनी, नातवंडे दृष्टी (६) आणि जुंगी (२) अशी मृतांची नावे आहेत. ओडाया येथील या एकमजली घरात पाच मृतदेह अंथरूणात आढळले, तर दोन मृतदेह गळफास घेतलेल्या अवस्थेत असल्याचे आढळले. दृष्टी ही शाळेत जाण्यासाठी स्कूलबसजवळ न आल्याने, तिच्यासोबत शाळेत जाणाऱ्या एका मुलीचे पालक चौकशीसाठी झा यांच्या घरी आले असता, ही बाब उघड झाली.