अर्धापूर तालुक्यातील ५०० हेक्टर क्षेत्र येणार सिंचनाखाली; २५ वर्षाच्या संघर्षाला यश

नांदेड - अर्धापूर तालुक्यातील अहमदपूर, इसामपूर व अर्धापूर शिवारातील शेतकऱयांच्या गेल्या २५ वर्षाच्या संघर्षाला यश मिळाले असून कालव्याच्या दुरूस्तीला शनिवारी सुरूवात झाली आहे. हे दुरूस्तीचे काम सुरू झाल्यामुळे शेतकऱ्यांत आनंदाचे वातावरण निर्माण झाले आहे. या कामामुळे सुमारे ५०० हेक्टर शेती पुन्हा ओलीताखाली येणार असल्यामुळे शेतकऱयांना 'अच्छे दिन' येणार आहेत.

अर्धापूर तालुक्यात उर्ध्वपेनगंगा व पुर्णा प्रकल्पाचे पाणी येते. तालुक्यातील पश्चिम भागातील अहदमपूर, इसमापूर, अर्धापूर, कोंढा, सांगवी या गावातील शिवाराला पुर्णा प्रकल्पाचे पाणी येत होते. पण गेल्या काही वर्षांपासून या गावातील शिवाराला पुर्णा प्रकल्पाचे पाणी मिळत नव्हते. तसेच ही गावे व शिवार प्रकल्पाच्या शेवटच्या टोकाला आहेत. तालुक्यातील इतर गावांना दोन धरणाचे पाणी मिळत असताना पुर्णा प्रकल्पाच्या लाभ क्षेत्रात असलेल्या या गावांना पाणी मिळत नसल्यामुळे शेती कोरडवाहू झाली आहे. या गावातील शेतकरी गेल्या अनेक वार्षापासून पाण्यासाठी व कालवा दुरूस्तीसाठी संघर्ष करत असून शेतकऱ्यांनी यासाठी सातत्याने पाठपुरावा केला आहे. यासाठी कामाजी गोरे, प्रविण देशमुख, गुणवंत विरकर, माणिकाराव देशमुख यांनी पाठपुरावा केला होता. तसेच माजी मुख्यमंत्री खासदार अशोक चव्हाण, आमदार अमिता चव्हाण यांनी पाटबंधारे विभागाच्या अधिकाऱयांना कालव्याच्या दुरूस्तीला लागणारी यंत्रणा तातडीने देण्याच्या सुचना केल्या.