लग्नामध्ये सहभागी वराची आई मुलाचे तोंड गोड करण्याच्या विधीमध्ये व्यस्त असताना एका अनोळखी व्यक्तीने तिच्या हातातील दागिन्यांची पर्स चोरून नेल्याचा प्रकार रविवारी सायंकाळी ठाण्यात घडला. या पर्समध्ये सुमारे ९ लाख ४५ हजार रुपये किंमतीचे दागिने असून येथील सीसीटीव्ही फुटेजमध्ये या व्यक्तीचे छायाचित्र पोलिसांना आढळून आले आहे. या प्रकरणी कासारवडवली पोलिस ठाण्यात चोरीचा गुन्हा दाखल करण्यात आला आहे.
ठाण्यातील माजिवडा येथील लोढा लक्झिरिया येथे राहणाऱ्या प्रकाश मित्तल (५६) व सुनीता मित्तल यांच्या मुलाचे लग्न आनंदनगर येथील एका हॉटेलमध्ये होते. त्यावेळी मुलाच्या तोंड गोड करण्याचा विधी होत असल्यामुळे सुनीता यांनी आपल्या हातातील पर्स बाजूला ठेवली. परंतु विधी पूर्ण झाल्यानंतर त्या पर्स घ्यायला गेल्या तेव्हा तिथे पर्स तेथे नव्हती. त्यामुळे त्यांनी शोधाशोध सुरू केली. कार्यक्रमस्थळाच्या ठिकाणी लावलेल्या सीसीटीव्ही फुटेजमध्ये एक अनोळखी व्यक्ती बॅग घेऊन जात असल्याचे दिसून आले. त्यामुळे त्यांनी कासारवडवली पोलिस ठाण्यात गुन्हा नोंदवला आहे. 
No comments:
Post a Comment